REJÎMÊ EBÛ LEHEBÎ Û MUCADELEYÊ MEZLÛMAN
“Bismîlahîrrehmanîrrehîm
1.Wa pûç bibo îqtîdarê Ebû Lehebî
2.Zengînîya îqtîdarî ey nêxelesnena
3.Ey erzena mîyanê adirê harî û sûrî
4.Cinîya ey a fesade zî kîşta ey de
5. Kendirê zexmî vileyê ey û aye ra vîyarnenî.”
Qurano Kerîm, Sûreya Ebû Lehebî (111)
Sûreya Ebû Lehebî ya Quranê Kerîmî de qalê Ebû Lehebî û cinîya ey beno. Ebû Leheb goreyê rîwayetan ra (qal û qîlê zûreyênî) datê (apî) pêxemberê ma yo. Ma nika nê rîwayetî ser nêvindenî. Çunke nê rîwayetî goreyê ma ra qalê zûreyên ê. Eke bîyero persayîş ke gelo Ebû Leheb kam o? Yan zî çina yo? Ma na perse ser o no hawa vanî: “Ebû” ziwanê erebkî de manaya ci “pîy/pêrd/babî” yo. “Leheb” zî, merdimo ke hêrsin, xedar, qetrehm, o ke adirî xedarîye ramita rîyê ey ser û rîyê ey bîyo sûr, bîyo sey çilaya adirî. Yanî “Ebû Leheb” pîyê adîrê harî, zalim û xedar o.
Ebû Leheb na sûre de yew temsîl/sembol/nîşane yo. Nîşaneyê îqtîdarê zaliman, qodemanan û sermayedaran o. Yanî, êyê ke bi quwetê îqtîdarî û zengînîye gonîya feqîr û fuqaran fir kenî. Hukûmdarîya xo bi neheqî dewam kenî.
No tewir îqtîdar pûç beno, qaîm nêbeno, xeripîyêno. Eke wina yo, do bixeripîyo û bêwayîr bimano. A game na zengînîye, no îqtîdar ne na dinya de û ne zî a dinya de zaliman nêxelisnenê… Na dinya de bindest heta heta bindest nêmaneno. Rocêk haya beno, ger xo weçînenu, bi nenguyanê xo çepexêno vîleyê zaliman, qodemana û lordan. Dinyaya bîne de zî, cayê înan çin o. Homa teala vano, “Ez înan erzena mîyanê adirê cehennemî, o adiro har û sûr. Û ê uca ebedîyen ezabê mi vînenî, xeyr û rehma mi qet zî înan nêxelisnena.”.
Kenaro bîn ra zî, Homa na sûre de bi temsîl/sembol/nîşane qalê zûrkeran û dirîyan û fesadan û ajanan keno. Peynîya înan ma rê vano. Na ajanîye zî temsîlen a cinîya ke xeberzaf a, zem û zûrî kena, xeberan çarnena, şarî verdana pê, aye ser o ameya vatiş.
O kendiro zexm zî, naye temsîl keno ke nê ajanî, bi pere û pul, bi meqam, bi îtîbar sey kutikî girêdayeyê verê berê axayê xo yê, gureyê înan zî mîyanê bindestan de fitne vetiş û muxbîrîye kerdiş o, medya û neşrîyatî reyde propaganda kenê ke hêşê/zêhnê şarî bixeripnê û însanan bikê ehmeq, bikê kole, bikê xulam… Yanî, efendîyanê xo rê koleyan virazê ke, nê koleyî aşiqê zencîranê esaretê xo bibê û bi zerrîya xo axayan rê koletîye bikê.
Homayê ma yo munteqîm, cehennemê xo yê ebedî de, înan rê estunê adirê harî viraştê, înan bi kendiranê zexman (kendir zî adirî ra yo) girê dano û întiqam û heqê bindestan înan ra gêno.
Na sûreya Quranê Ezûmuşşanî ra yeno fehmkerdiş ke Ebû Leheb yew zîhnîyetê koledaron o, cinîya ey zî zîhnîyetê koleyan a.
Meseleya bindestan û zilimkaran, kitabê ma yo muqedes de tewir bi tewir, açe bi açe ameyo qalkerdiş ke herkes fehm bikero, wezîfeyê xo bîyaro ca.
-……………………
