ZAZAKİ RUBAİ
60-
Ehlê mey bîyayîş, her ca de azadîyeya
Haya geyrayîş kufrû, rakewtiş bextîyareya
Remayîş yew şerefû, mendiş zî risîyayeya
Qanunê felek no hawa yo, dinya ewareya
61-
Ma no hawa yew cematîkeyî, ma qet xo de nîyî
Eşq û şerab hunerî ma yo, ma na dinya ra nîyî
Şewî rocî, çepî raştî, holî xirabî, ma vîrî de nîyî
Dinya şima rê bimbarik bû, ma ehlê menfîet nîyî
62-
Pirnikê ma erd ra şî qey ma zur nêkerd
Tim û tim ma feqîrî qey ma dizdî nêkerd
Şari, ma de xayînû qey ma yaranî nêkerd
Ma binî lingan ra şî qey ma asparî nêkerd
63-
Gole lêla, boyîna mase se bikû
Gure çep şêrû yî çawa raşt bikû
Masegêr tore eşta, neternenû
Mase neçarû yî çawa ceng bikû
