RUBAÎ(ÇEHERRÊZ)

RUBAÎYAN (ÇEHERRÊZ)
XERÎBÊZEMAN


1-

Emş, şew a derg a, tenik a barî ya
Ena marî, rindek a zaf weş a delalî ya
Lo hozan o! feqîr o!cayê xo viraze!
Mey a xo bi şime! zindewarî yarî ya


2-

Hero camêrd o! Pay bide ard ro, tuf bike
Zaf nemrudî binî lingan to de lanet bike
Meyxone ra meveci, birînê esaret daru bike
Dinya Silêman rê zî nêmanda, çîk derd meke

3-

Bê bira bê! sofreyê ma de, dostanî û yâranî esta
Meyxaneyê ma de, sey şite may to, mey a helâl esta
Mezhebê ma, rayero heqo, tede xelasî û azadî esta
Xo teslîm bike, îqrar û îman de, şênayî û roşanî esta



4-


Şerab mird bi şime, kêf biki
Zerran meşikin, weş saz biki
Dinya venga, weş fehm biki
Îxtîyarî esta, lez a lez eşq biki


5-

Keyneyê no demî zaf bî zungurî
Xeberê pîlan nêkenî, bî xo ra xorî
Sibat ame, kenî qiranaw û mirrmirrî
Lacî, neçar mendî, xo rê se bikerî



6-

Bira! Semedê na dinya derd meviraze
Binê na dinya diryawo derz meviraze
Gunê engur fir bike, qet ceng meviraze
Zeng deke milê aye ra xo rê şeng viraze




7-

Ez qurbanê camêrdo zerr şite beno
Wa bêro cay êy serî çiman sero beno
Hozanê goşdarîye bikîn veynîn se beno
Merdumo ehmeq zî cara merdum nêbeno


8-

Ey merdumo kor! Ard û asmîn de her çî veng o
Merdumo her, îta-uca, her ca de bêhîş û leng o
Merdumo serxoş, îta-uca, her ca de azad û şeng o
Hol bizane! Peyîn a peyîn peyneyê to zî merg o


9-
Zemano ke vîyart û şîyo pê ax meke
Meşt zî neame yo pê wel-wele meke
Xeyalê vizêr û meşt rê xo vêran meke
Enka roşan bike demê xo îsraf meke

10-

Eke felek aştîye nêwazena, ho ci rê ceng
Wazena mi ra vacîn aqil, vazena sereveng
Waxtu ke ez bi şimo şerab, çeng bi çeng
Xora azad o koyan de mi veng dayo veng

11-

Verê meyxanan de ma cilê xo kerdî ra
Halê ma xeriban, malum o Homay ra
Binê mînberan de ma xeneqyayî gune ra
Dem demê pak kerdîş o cehlê sofîyan ra



12-

Eke ti geyrenî, rayero hol û raşt û baş
Awê engur bişime, xo weygi mebi şaş
Çîyo helal bo, meke verê mordar û laş
Zahidî û sofîtî ra fek verd, mebi sey vaş




13-

Eke bi eşq nêelewyaya zerrîya to
Tu cayek de çîn a roşnê çiman to
Lez bik çîk bik, nizdî yo ercelê to
Goştarîye bik, ana van o ustadê to



14-

Vanî; xirab şinî cehnem holî zî cennet
Her dî zî şima rê bî ma rê çîno minnet
Awê adir şimitiş de ma rê çîno zîllet
Ma, azad û asonî ma rê bind çîno kulfet


15-

Bira keko! Bi qerefin zemberekê ena felek
Karê dinya tevşo-mevşoyo, lêl a çerxa belek
Doyê xo rê nêvan a tirş o ena dewuca xalek
Tima ke no hawa ya birem! Hêdîlek-hêdîlek

16-

Tim û tim xerepênu saz benu en ca
Zanayîşo mutlaq çîn o megêr îta uca
Pirnikê xo veyşnin, karê xo zî bîya ca
Zur meke fekê xo bi derz meşo her ca


17-

Ser bi zemîn dum ber hawa
Ti adil nî! Kar fira şi ber hawa
Şeytano leîn, pê to mird hewa
Dirî yo! To rê beheşt çîno no hawa


18-

Şewşewoka şewreng de helawet çîn o
Merdimo pirrkîn rê huyayîşê roj çîn o
Merdimo hesud rê cayek de lezzet çîn o
O ke çikod û zikruto, ci rê mirdone çîn o


19-

Ya îlahî! Ez yew, bendeyê toyo gunehkar
Ez risîyayo şermezaro, çîlekêşo cefakar
Ez parsegerê ver zifqêrê to ya bexşkar
Bi çîmê afu, mi ser o biewn! Tîyî afukar

20-

Serê sereyê mi de webîyo adirê eşqê Homay î
Ez şaş û lal û mat mendo ber bi pîleyê Homay î
Vînayeyê çimanê mi gêryaya, ber bi nurê Homay î
Gunehê mi zafî, ez şêro verê berê rehma Homay î

21-

Çimê min zaf şewan bêhewn mendî
Ayî ke mi ra hes kenî! Koca de mendî
Nalayîş û bermayîş û qehr, mi rê rindî
Ez şerab nêwer o!Kam boro her şandî
22-

Herey dilber! Leze veyce na pencera
Hozan remzi, semedê to zaf ray zirça
Bizan ke bê to, yî rê çîna asanî û roşna
Qey xatirê Homay kena, ti yî nêqewerna


23-

Reyna xemgîney kewta serê sîneyê mi
Adirê na puteka sêwî kewtû zerrîya mi?
Qers kewta ci, ameya verê keyberê mi?
Ez çawa însan o!Wa veyşû keyeyê mi?




24-

Şar mi ra vanû;deluyû serxoş
Her çî terk kerdû bîyû berdoş
La ez zî vano; dinya zurayîna
Mey heqa, her çî zî pel û puş

25-

O çiman to de fîtne estû zerrîya mi kerda xirabe
Adirê eşqê to cîgerê mi veyşnaya kerda weyrane
Ey zerr! Zulumatê şew de hesran bivarin dua biki
Duayê şew meqbula belkî eno eşq ra ti biba azade


26-

Ey sakî! Lez bîya wextê şerab şinû
Ey mitrib! Lez pirod wextê kêf şinû
E’mrê mi na dinya de bisefalet şinû
Barê mi karwan de birezîletîye şinû

27-

Ez bêkeso, bêhalo nîme rayer de mendo
Ez aşiqo bêsebro mîyanê kulî de mendo
Kamî pelê ciwîyayîşê gulê mi qurmiçnayî
Hînî mi rê merg lazimo, ez sêwî mendo

28-

Ey zerr! Meyxane de ruşi padîşahî biki
Şerab bo! Aşm û roj rê hukumdarî biki
Tim û tim bihew kilamanê weşan vace
Binê rehma Homay de bendetîye biki


29-

Bê to heme rojî tarîyî mi rê benî şewî
Adirê abirnayîş ra zereyê mi pirr kulî
Herê dilber! Bê to pêrî vateyî benî zurî
Vengê bilbil birênû pulêsênî heme gulî





30-

Ey yar! Muya zulfê to mi rê zincîr a
Ez bîyo delu, mi het de ti qey dura
Zincîr delu aqil kena, la ê mi zaf zora
Hewnê to beso! Homay kena ti nêra


31-

Awir û xamze û zulfê to pirr belayî
Eşqê to ser mi di çekuyî pê ra nayî
Nuşteyê xo, mi fekê teyran ra nayî
Ay teyrî erd û asmîn de to geyrayî


32-

Mi birezîletî û risîyayî sero name kerdû
Nêeşkeno bêro dergah mi qibhet kerdû
Afu bikîn gelê dostan! Mi xo palas kerdû
Wextîk Elîyar zî qatîlê xo bişefqet afu kerdû